الرئيسية » » زفة سما | بسمه شعبان

زفة سما | بسمه شعبان

Written By Unknown on الاثنين، 25 أغسطس 2014 | 5:13 م


زفة سما
 

وفتحت روحى على الورود مالوا
قمر الليله دى البدر فى تمامه
من نحت روحى اتلموا خدامه
حبة ملايكه اترصوا ع الصفين

والنيل بيجرى مداده من دمعه
دى عروسة باكيه وناسها مش سامعه
كل اللى سامع عينه مش باكيين

نبتة ورود مسقيه م الجنه
نفدت تاريخ الصبر قدامنا
منِّت عيون الغلب تستنى
غنا اللى غنا وهما مش حاسين

يانخيل وطارح فى السما عزه
مسقي بسنين القهر من غزه
والا انت سورى الاصل بغدادى
هز فى جدار الياس مية هزه

يابلاد وفيها الخلق بالكيله
صفوا الصفوف الباقية فى الشيله
غطوا فى بيوت الطهر بالويله
دى أمانى فاسدة فى دعوة الباطلين

توابيت وشاهده على الكتاف عله
وخيال مآته بينتفض ذله
نطق اللسان الحق فى الضله
حضر اللى غايب فى اللى مش حاضرين

كان نفسى اشوف الصبح متحنى
والشمس لابسه العقد والتلى
زفة عروسة بتتولد منى
فستانها لابيض مفرود على الرايحين

ضموا الايادى ورا التاريخ ضموا
شموا فى عبير الجرح واتمنوا
أمة شفيع الخلق بيهنوا
دمعة بلاد الظلم ع الشاكيين

علم العروبة بيرفعوا الخايب
ردوا النشيد وعينيكوا ع الشايب
من الليلادى صلاتكوا للغايب
غنوة ولاد القهر مش حطين

طفوا الشموع الباكيه فى العتمه
أخرس مداد الحرف فى السكنه
صوت البارود ماتردهوش ركعه
شد الزناد محتاج لناس تايبين
شد الزناد
محتاج لناس تايبين
 
 
التعليقات
0 التعليقات

0 التعليقات:

إرسال تعليق

يتم التشغيل بواسطة Blogger.