الرئيسية » » ويفيد بإية | بسمه شعبان

ويفيد بإية | بسمه شعبان

Written By Unknown on الثلاثاء، 19 أغسطس 2014 | 4:02 م

 
 
ويفيد بإية
 
 
لو الكلام فى القهر يتحول بدن؟

لو يتحفر بالظلم
طاقة....مرة فى جدار الزمن

لو تنغرس فى حروف تاريخنا
ألف شمعاية ألم

مابتنكسر كل البحور اللى انكتب بيها الشجن !!

ياغربتى
وانا بين خبايا الاوردة بنزف جراح

بضحك فى وش الدمع
يغوينى الصباح

فى الصدر نافدنى البراح
بيضم فى اللى ما يحتمل

عقرب فى ساعه
فى وش دنيا
فى وسط تغريببة فتور

وفى شق غيبة
فى قلب روحى
كام مرة ضميتنى السطور

يا امايه احضان الوصال مش زى احضان المحن !

باشتاق لسهم فى ضى عينِك
يلحقنى م اللى ما حبنى

انا اصلى بترجى الفرح

إضحك فى وشى
تشدنى

يا امايه وِلدِك مشتهى
يدفى فى كفوف العيال

لساته مُهر شديد عفى
لو مره يلمح غصن مال

يا امايه شاب الشعر
والضهر اتحنى

والقلب لاخضر
لساته بيشد الرحال

ياسفينه تايهه
لفين هاترسى دمعتى

كل الايادى بترتجف
كل الوشوش فيها الردى

وندهت ياما ع اللى غاب
ع اللى فى تراب العمر داب
واللى ابتلى قلبى بأمل
ع اللى انجرح
واللى جرح
واللى اشتهى فيا العذاب

كل البيبان اتفتحت
كل الحيطان اتجرحت

آيل لشبه سقوط أنا
مفطوم فؤادى ع المنى

من كتر ما القلب اغتوى
مابقيتش حاجة بتنجرح

لا الحزن يوم بيهدنى
ولا مرة برقص م الفرح
 
 
التعليقات
0 التعليقات

0 التعليقات:

إرسال تعليق

يتم التشغيل بواسطة Blogger.